លោក រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានបញ្ជាក់ថា ប្រទេសកម្ពុជានឹងទទួលបានកំណើនសេដ្ឋកិច្ចក្នុងរង្វង់ពី១ទៅ២% សម្រាប់ឆ្នាំ២០០៩។ ការថមថយនេះគឺបណ្តាលមកពីវិបត្តិសេដ្ឋកិច្ចពិភពលោក។
ប្រទេសកម្ពុជាអាចនឹងទទួលបានកំណើនសេដ្ឋកិច្ឋក្នុងរង្វង់ពី១ ទៅ២%ប៉ុណ្ណោះសម្រាប់ឆ្នាំ២០០៩នេះ រីឯកាលពីឆ្នាំ២០០៨កន្លងមក កំណើនសេដ្ឋកិច្ចសម្រេចបានក្នុងអត្រាជិត៧%។ នេះគឺជាគូសបញ្ជាក់របស់លោកគាត ឈន់ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ នៅក្នុងឯកសារជំនួយស្មារតីរបស់លោក។
ឯកសារជំនួយស្មារតី របស់លោកគាត ឈន់ ដែលអ្នកកាសែតទើបទទួលបាន បានបញ្ជាក់ថា វិបត្តិហិរញ្ញវត្ថុពិភពលោកបានបង្កហានិភ័យមួយចំនួនដល់ ប្រព័ន្ធសេដ្ឋកិច្ចនិងហិរញ្ញវត្ថុកម្ពុជា ជាពិសេសការស្រុតចុះនៃប្រភពហិរញ្ញវត្ថុ និងលំហូរទុនវិនិយោគឯកជន។
កាលពីពេលកន្លងមក ស្ថាប័នហិរញ្ញវត្ថុអន្តរជាតិមួយចំនួនធ្លាប់បានទស្សន៍ទាយថា ដោយសារវិបត្តិសេដ្ឋកិច្ចពិភពលោក កម្ពុជានឹងមិនទទួលបានកំណើនសេដ្ឋកិច្ចនោះទេសម្រាប់ឆ្នាំ២០០៩ នេះ។ អ្នកសេដ្ឋកិច្ចមួយចំនួនបានវាយតម្លៃថា ឆ្នាំ២០០៩គឺជាឆ្នាំដែលប្រទេសកម្ពុជាប្រឈមខ្លាំងជាងគេ។
លោក គាត ឈន់ បានបន្តក្នុងឯកសារជំនួយស្មារតីរបស់លោកថា វិស័យដែលទទូលរងផលប៉ះពាល់ខ្លាំងជាងគេ គឺវិស័យកាត់ដេរ វិស័យទេសចរណ៍ វិស័យសំណង់ និងវិស័យអចលនទ្រព្យ។ ប៉ុន្តែលោកមិនបានបញ្ជាក់លម្អិតពីទម្ងន់នៃផលប៉ះពាល់នោះទេ។
លោក ជា មុន្នី ប្រធានសហជីពសេរីកម្មករ នៃព្រះរាជាណាចក្រកម្ពុជា ធ្លាប់បានប្រាប់អោយដឹងថាៈ ចាប់តាំងពីមានវិបត្តិសេដ្ឋកិច្ចមក កម្មករប្រមាណជា៤ម៉ឺននាក់បានបាត់បង់ការងារ ក្នុងវិស័យកាត់ដេរ។ កម្មករមួយចំនួនបានវិលត្រលប់ទៅស្រុកកំណើតវិញ រីឯមួយចំនួនទៀត បានប្តូរមុខរបរ។
ទាក់ទងនឹងវិស័យទេស ចរណ៍ លោកហូ វ៉ាន់ឌី អតីតប្រធានសមាគមទីភ្នាក់ងារវិស័យទេសចរណណ៍កម្ពុជា បានអោយដឹងថា ដោយសារវិបត្តិសេដ្ឋកិច្ច សណ្ឋាគារ នៅក្នុងខេត្តសៀមរាបប្រមាណជា១០ត្រូវបានបិទទ្វារ ឬផ្អាកសកម្មភាពមួយរយៈសិន។ លោកបានបន្តទៀតថា ភ្ញៀវទេសចរមកទស្សនាអង្គរវត្តមានការថយចុះច្រើន បើទោះបីតួលេខថ្នាក់ជាតិមានការថយចុះតិចតួចក៏ដោយ។
ចំពោះវិស័យសំណង់ និងវិស័យអចលនទ្រព្យ អ្នកជំនាញមួយចំនួនបាននិយាយថា សកម្មភាពវិនិយោគក្នុងវិស័យនេះមួយចំនួនបានផ្អាកសកម្មភាព។
បើទោះបីជាវិស័យមួយចំនួនកំពុងរងផលប៉ះពាល់ពីវិបត្តិសេដ្ឋ កិច្ចពិភពលោកក៏ដោយ ក៏វិស័យទូរគមនាគមន៍ហាក់បីដូចជាកំពុងរីកលូតលាស់ទៅវិញ។ របាយការណ៍របស់កម្មវិធីអភិវឌ្ឍន៍សហប្រជាជាតិ ហៅកាត់ថា UNDP បានបញ្ជាក់ថា វិស័យទូរគមនាគមន៍បានកើនឡើង៣០%ជារៀងរាល់ឆ្នាំក្នុងរយៈពេល៥ ឆ្នាំចុងក្រោយនេះ។
លោកគាត ឈន់ បានបញ្ជាក់ក្នុងឯកសារជំនួយស្មារតីរបស់លោកថា រាជរដ្ឋាភិបាលបាននឹងកំពុងចាត់វិធានការណ៍សម្រួលពន្ធអាករលើទំ និញមួយចំនួន និងលើកលែងពន្ធលើប្រាក់ចំណេញសម្រាប់ការវិនិយោគក្នុងវិស័យមួយ ចំនួន៕
By Ky Soklim (Radio France International-FRI)
